Esaki ta proyekto kaminda maestronan mes lo determiná kiko ta e normanan ku un maestro mester kumpli kuné pa e ta bon profeshonal aki na Kòrsou. Den kuadro di esaki nos a nombra 11 trekker ku lo bai direktamente serka e maestro pa konhuntamente nos yega na e normanan di kalidat pa Kòrsou. Ku e normanan aki nos por midi kalidat di nos enseñansa i tambe kompará esaki ku kalidat di enseñansa di otro paisnan.

Meta di esaki no ta pa kompetí ku otro paisnan sino pa nos ta konsiente kuantu i kiko tin ku sosodé pa alkansá e kalidat di enseñansa ku nos yunan, yunan di nos yunan i pues nos pais mester i meresé.

Na òktober 2012 nos a traha huntu ku vèlt di enseñansa e “frame” di e dokumentu den kua mester formulá e normanan. Na novèmber 2013, despues di ku atraves di nos ‘trekkernan’ nos a inventarisá opinion i pensamentu di mas di 400 maestro, nos a presentá e totalidat aki durante un konferensha den forma di un dokumentu di vishon (visie document). E dokumentu di vishon aki durante e konferensha ariba menshoná a keda validá dor di vèlt di enseñansa presente. E dokumentu di vishon aki ta e base for di kua nos ekspertonan a formulá e normanan.

Durante e último etapa di e proseso aki, pa medio di nos ‘trekkernan” vèlt di enseñansa mester ratifiká e normanan aki. Na mei 2014, atraves di un konferensha di trabou kaminda vèlt di enseñansa a partisipá, e proseso aki a yega na un momentu krusial. Nos koleganan di ‘Onderwijscoöperatie’ di Hulanda, ku nos tin un akuerdo di koperashon di trabou kuné den kuadro di realisashon di e proyekto aki, tambe tabata presente i a duna nan aporte durante e konferensha di trabou aki.

Na novèmber 2014 nos a presentá e dokumentu final. Resultado di e proyekto aki a keda publiká pa medio di e buki “Norma di Kompetensia Dosente Kòrsou”.