Klave #5; Boletin Informativo KPEK
Intro
Ata aki nos di #5 Klave di e aña koriente siguiendo ku nos maneho di duna informashon di nos aktividatnan den kuadro di promoshon di kalidat di enseñansa.
Temporada final di aña eskolar
Ya nos ta den e temporada final di aña eskolar ku ta enserá pruebanan final, èksamen i reunionnan krusial riba tur nivel i den tur sekshon di enseñansa. Esaki naturalmente ta un temporada di hopi tenshon serka tantu maestro, alumno i studiante i tambe serka mayor. Un i tur ta ansioso pa sa resultado di un aña di trabou duru. Eksamen di EFO a pasa i tur alumno i mayor ta warda ansiosamente pa sa e resultado ku ta determiná e direkshon den enseñansa avansá ku nan lo bai. Di otro banda studiantenan ku prueba final tambe ta den tenshon ya ku ta e resultado ta determiná kon nan ta bai sigui ku nan estudio. En fin; tur e tenshon aki tantu riba alumno, studiante, maestro i mayor ta krea un ambiente spesial ku ta tipifiká e temporada final di aña eskolar.
Den e kuadro aki nos ta deseá un i tur, alumno, studiante, maestro i mayor hopi éksito i forsa den e temporada krusial aki; esta final di aña eskolar 2018/2019!
Ultimo Kafé pa e aña eskolar aki
Manera semper riba promé djaluna di luna nos ta organisá nos Kafé Edukashonal. Nos ta aserkando yüni i riba djaluna 3 di yüni 2019 nos lo tene nos último Kafé pa e aña eskolar aki.
Den e Kafé aki nos lo konsentrá riba tres punto; nos lo lansa “website” nobo di KPEK, nos lo duna un proyekshon di aña eskolar nobo i komo chèri riba e bolo nos lo para ketu na Fundashon KPEK su di 9 aniversario. Ku otro palabra un Kafé ku bo no mag pèrdè ya ku esaki lo tin su toke spesial pa asina finalisá nos aña eskolar koriente.
E Kafé aki ta tuma lugá riba djaluna 3 di yüni 2019 di 7or pa 9or di anochi na restorant Prime na Zuikertuintje mall. Pues un Kafé ku ta pinta di bira unu tremendo i manera ya kustumbrá; ala KPEK.
Nos puntonan di kontakto
Pa kualke informashon, pregunta i/o sugerensha bo por tuma kontakto ku nos. Nos adrès elektróniko ta kalidatedukashonal@gmail.com. Nos facebook ta: Kalidat Edukashonal
Nos página riba “YouTube” ta “Fundashon KPEK”. Nos kantor ta situá na Pos Cabai Officepark Unit 5, Schouwburgweg z/n i nos number di telefòn na kantor ta 737-2025. Tambe por ‘app’ nos riba 511-4032.
Donashon/Aporte Finansiero
Na personanan i/o instansha ku ta aserkando nos pa duna un aporte finansiero ku e pregunta kon nan por hasi esaki na un manera mas struktural nos ta pone aki nos numbernan di kuenta:
RBC: 104.16.846 Giro: 112.70.28 MCB: 25.820.508
Na nòmber di henter famia KPEK nos ke yama boso tur danki di antemano pa e konfiansa i e aporte. Nos ta apresiá e gesto aki!